پاکستان ایک سیاسی تجربہ ہے، اسے کامیاب کیجیے

پاکستان ایک سیاسی تجربہ ہے۔ پاکستان کے ارباب حل و عقد کا فرض ہے کہ اس تجربے کو کامیاب بنائیں، ادھر ہندوستان کے ارباب بست و کشاد کو لازم ہے کہ پاکستان کو ایک حقیقت مان لیں اور تسلیم کر لیں کہ اب جانبین میں دوستانہ تعلقات اور اشتراکِ عمل ہی ان کی بقا و استحکام کا باعث ہو سکتے ہیں اگر نفرت کا شعلہ بھڑکتا رہا تو دونوں ملک عالمی طاقتوں کے مقاصد کی چِتا میں بھسم ہو جائیں گے ۔ یاد رہے کہ سیاست کے پہلو میں دل نہیں ہوتا کوئی سی طاقت اپنے اغراض کی خاطر تضادات سے مصافحہ و معانقہ کرتی ہے تو اس میں آخر کار خسارا ہی ہوتا ہے۔

۔۔۔۔۔

ابوالکلام آزاد از شورش کاشمیری صفحہ نمبر 238۔

مسلمانانِ ہند سے خطاب ۔ جامع مسجد دہلی اکتوبر ۱۹۴۸

میرے عزیزانِ گرامی! میں آپ سے یہ بات معلوم کرنا چاہتا ہوں کہ اگر تم کسی خونچکاں نعش پر ایک ریشمی لحاف ڈال دو گے تو کیا یہ ثابت کر سکو گے کہ یہ مردہ نعش نہیں ہے؟ 

اللہ علیم ہے کہ مجھے سورج اور چاند کے وجود کا اتنا یقین نہیں جتنا حق کی کامیابی اور باطل کے خسران پر ایمان ہے۔ 

کوئی سچی بات اس لیے ترک نہیں کی جاسکتی کہ لوگ اُس کا استقبال نہیں کریں گے ۔ سچ سچ ہے اگرچہ تمام  عالم میں اس کا ایک بھی دوست نہ ہو۔ 

اگرچہ دنیا میں ایسے لوگ ہیں جن کو چراغ کی روشنی دھندلی نظر آتی ہو تو یہ ان کی آنکھوں کا ضعف ہے۔ ان کی خاطر  چراغ گل نہیں کیے جا سکتے۔ 

مسلمانانِ دلی سے خطاب اکتوبر 1948ء 

۔۔ 

آزاد رہنا ہر فرد اور قوم کا پیدائشی حق ہے۔ کوئی انسان یا انسان کی گاڑھی ہوئی بیوروکریسی یہ حق نہیں رکھتی کہ وہ خدا کے بندوں کو اپنا محکوم بنائے۔ محکومی اور غلامی کے لیے کتنے ہی خوشنما نام کیوں نہ رکھ لیے جائیں لیکن وہ محکومی اور غلامی ہی ہے ۔ اور خدا کی مرضی اور اس کے قانون کے خلاف ہے۔ چنانچہ جب ہمارا اسلام مسلمانوں کو یہ فرض قرار دیتا ہے کہ ایسی مسلمان حکومت کو بھی منصفانہ تقسیم نہ کریں جو قوم کی رائے اور انتخاب سے وجود میں نہ آئی ہو۔ اگرچہ آج ہندوستان میں ایک خالص مسلم حکومت قائم ہو جائے مگر اس کا نظام بھی شخصی ہو یا چند حاکموں کی بیوروکریسی ہو تو اس وقت بھی میرا یہ فرض ہوگا کہ اُسے ظالم کہوں اور تبدیلی کا مطالبہ کروں۔ 

مولانا ابوالکلام آزاد 

۔۔۔۔۔۔۔۔۔۔۔۔۔۔

یادِ رفتگاں ۔۔۔۔ مولانا ابوالکلام آزاد

کانگریس پارٹی میں مولانا کو جو مقام حاصل تھا وہ اور کسی کو حاصل نہیں ہوا۔ ان کے رعب اور دبدے کا یہ عالم تھا کہ اچھے اچھوں کا پتا ان کے آگے پانی ہوتا تھا اور ولبھ بھائی پٹیل اور گووند ولبھ پنت جیسے بڑے کانگریسی رہنماؤں کی بولتی ان کے سامنے بند ہوجاتی تھی۔ انتہا تو یہ ہے کہ جب وہ وزیر تعلیم تھے تو وزیر اعظم نہرو تک ان سے وقت طے کرکے ملاقات کیا کرتے تھے۔ نہرو کا کہنا ہے کہ ’مولانا کےعلم اور مطالعے کے سامنے مجھے اپنا علم دریا کے سامنے پانی کا ایک قطرہ دکھائی دیتا ہے‘ عبدالرزاق ملیح آبادی رقم طراز ہیں کہ ’ایک دن ایسا ہوا کہ کوئی پانچ بجے شام گاندھی جی اچانک آ پہنچے، میں نے ان کا استقبال کیا اور دوڑ کر مولانا کو اس کی خبر کی۔ انھوں نے سنا، مگر جیسے سنا ہی نہیں۔ ٹس سے مس نہ ہوئے۔ فرمایا ’ان سے کہہ دیجیے کہ میں اس وقت ان سے ملنے سے معذور ہوں۔ کل نو بجے تشریف لائیں‘ عرض کیا ’غور فرما لیجیے، کیا یہی پیغام پہنچادوں؟ ‘کسی قدر تیکھے تیوروں سے فرمایا ’اور کیا؟ گاندھی جی میں سرخاب کے پر تو نہیں لگے۔ گاندھی جی بھی مہاتما تھے بغیر ماتھے پہ شکن ڈالے واپس چلے گئے اور اگلے دن نو بجے تشریف لائے۔ 

‘مولانا آزاد کی شخصیت کا احاطہ کرنا نا ممکن کی جستجو کے مترادف ہے۔ وہ تحریر و تقریر دونوں کے لحاظ سے اپنی مثال آپ تھے۔ وہ حکمت میں عقدہ کشا، سیاست میں صاحب تدبیر، حکومت میں فیض ذیشان اور بزم میں صاحب علم و کمال تھے۔ ان کی یادداشت کا عالم یہ تھا کہ لاکھوں اشعار انھیں زبانی یاد تھے۔ ان کی بے مثل شخصیت قدیم و جدید اقدار کا حسین سنگم تھی۔ بصیرت کے اعتبار سے بھی مولانا کا کوئی ہمسر و ثانی نہیں تھا۔ اس حوالے سے ان ہی کے منہ سے نکلا ہوا یہ فقرہ یاد آرہا ہے کہ ’تم لوگ پانی اور کیچڑ کو دیکھ کر بارش کا یقین کرتے ہو، میں اس کو ہوا میں سونگھ کر جان لیتا ہوں۔‘‘بلاشبہ مولانا کا شمار ان چند برگزیدہ ہستیوں میں ہوتا ہے جو اپنے عہد سے کہیں زیادہ بڑی تھیں، بلکہ عہد سازتھیں

اقتباس از افسانۂ ہجر و وصال

تمہاری مسجدیں تڑپ رہی ہیں کہ راست بازوں کی تڑپتی ہوئی اور مضطرب نمازیں ان کو نصیب ہوں، مگر حیوانوں اور چارپایوں کے کھڑے رہنے اور اوندھے ہو جانے کے سوا وہاں کچھ نہیں ملتا۔ حالانکہ تمہارا خدا تمہارے کھڑے رہنے اور اوندھے گر پڑنے کابھوکا نہیں۔ اور اگر صرف پاؤں کو کھڑا رکھنا ہی عبادت ہوتا تو جنگل کے درختوں سے زیادہ تم کھڑے نہیں رہ سکتے

۔ـــــ

از: افسانہء ہجر و وصال